Қазақстанда құрылыс саласындағы цифрлық трансформация жалғасады — шағын құрылыстарды (сарайлар, моншалар, беседкалар мен жазғы асүйлер) бұзу енді хабарлама тәртібімен жүзеге асырылатын болады. Бұл туралы Үкімет отырысында Цифрлық даму, инновациялар және аэроғарыш өнеркәсібі вице-министрі Дмитрий Мун хабарлады.
Оның айтуынша, 2024 жылы Индустрия және құрылыс министрлігі тарапынан 6 миллион мемлекеттік қызмет көрсетілген, олардың 96%-ы электронды форматта. Қазіргі уақытта бұл қызметтерді электронды түрде де жеңілдету үшін реинжиниринг жүргізілуде.
«Құрылыс саласында жетілдіруді қажет ететін процестер бар. Қазіргі таңда құрылыс кезеңдерінің әрқайсысында әртүрлі ақпараттық жүйелер қолданылады, ал құжаттар скан түрінде өткізіледі», — деді вице-министр.
Негізгі бағыттардың бірі ретінде құрылыс жұмыстарының барлық кезеңдерінде BIM технологиясын (ғимараттарды ақпараттық модельдеу) енгізу жоспарланып отыр. Бұл — жобалық және құрылыс құжаттарын біріктіретін 3D-форматтағы цифрлық модель. BIM технологиясын қолдану арқылы:
- жобалау және құрылыс мерзімдерін 25%-ға дейін қысқартуға;
- құрылыс шығындарын 10% және одан да көп мөлшерге азайтуға;
- ғимараттарды пайдалану шығындарын 15%-ға дейін төмендетуге мүмкіндік береді.
Сондай-ақ шағын құрылыстарды бұзу бойынша қызмет көрсету процесі жеңілдетіледі. Бұрынғыдай жеке рұқсат алу орнына азаматтар тек хабарлама жолдайды. Бұл процесс толықтай автоматтандырылып, «Мемлекеттік қала құрылысы кадастры» жүйесі арқылы жүзеге асады. Нәтижесінде:
- қадамдар саны 87%-ға қысқарады;
- қажетті құжаттар саны 86%-ға азаяды.
«Біз қағазбастылықтан толығымен арылып, бұл процесті азаматтар үшін мүмкіндігінше жеңіл әрі ыңғайлы етуді ұсынып отырмыз», — деп атап өтті Дмитрий Мун.
