Қазақстанда газ есептегіштерінің көрсеткіштерін автоматты түрде жіберуге арналған пилоттық жоба іске қосылды. Жоба жасанды интеллект технологиялары арқылы жүзеге асырылуда және отын-энергетика кешенін цифрлық трансформациялау аясында QazaqGaz Aimaq компаниясы тарапынан іске асырылып жатыр.
Қосымша қазіргі таңда Қызылорда, Қостанай және Түркістан облыстарында тестілеуден өтуде. Қазірдің өзінде 7 мыңнан астам пайдаланушы бұл цифрлық сервисті орнатып үлгерген, әсіресе Түркістан облысында шешім оң пікірлерге ие болды.
Қалай жұмыс істейді:
Пайдаланушы мобайл қосымша арқылы есептегіштің фотосын түсіреді. Жасанды интеллект автоматты түрде сандарды танып, деректерді жүйеге жібереді. Бұл:
- бақылаушының келу қажеттілігін жояды;
- түбіртектердің жылдамырақ жасалуына мүмкіндік береді;
- қателіктердің туындау қаупін төмендетеді.
Компания мәліметінше, бұл қосымшаны қолдану операторлардың жүктемесін азайтады, есептеулердің ашықтығын арттырады және газды тұтынуға деген жауапкершілікті күшейтеді.
Жақын арада қосымшада пайда болатын жаңа функциялар:
- төлемдер тарихы;
- есептегіштерді тексеру мерзімі туралы ескертулер;
- желідегі техникалық жұмыстар жөнінде хабарламалар.
Сондай-ақ әзірленіп жатқан мүмкіндіктер:
- виртуалды көмекші;
- адал пайдаланушыларға арналған бонустар мен кэшбэк жүйесі.
Бұл жоба ҚР Энергетика министрлігі тарапынан мемлекеттік цифрландыру стратегиясы мен халыққа қызмет көрсету сапасын арттыру бағытында қолдау тапты.
