Жасанды интеллект модельдері, цифрлық порталдар мен волонтерлерге арналған мобильді қосымшалар – Қарағандыда өткен HackCor Hackathon-да қатысушылар жемқорлықпен күреске бағытталған өз жобаларын таныстырды. Командалар 36 сағат бойы нақты жобалар бойынша жұмыс істеп, жүлделі орындар үшін сайысты және мемлекеттік басқаруда ашықтықты арттыруға үлес қосуға тырысты.
HackCor Hackathon: не үшін қажет?
HackCor Hackathon – бұл Қарағандыдағы «Террикон алқабы» стартап-экожүйесі ұйымдастыратын технологиялық марафон. Мұндай шаралар жас мамандар мен студенттерге өз қабілеттерін сынауға, нақты проблемаларды шешуге бағытталған прототиптер жасауға мүмкіндік береді.
Шараның серіктесі – ҚР Сыбайлас жемқорлыққа қарсы іс-қимыл агенттігінің Қарағанды облыстық департаменті. Хакатон аясында екі негізгі тапсырма ұсынылды: бірі – мемлекеттік сатып алулардағы күмәнді әрекеттерді анықтайтын жасанды интеллект модулін әзірлеу, екіншісі – волонтерлерге арналған қолданбалы платформаны жасау.
Қатысушылардың жобаларын Telegram, Apple, Microsoft, Ozon, Signal Ocean сынды халықаралық ІТ-компаниялардың инженерлері мен сарапшылары бағалады. Барлығы 200-ден астам адам, 62 команда қатысты.
Жеңімпаздар кімдер болды?
Бірінші кейс – мемлекеттік сатып алуларды талдайтын жүйе:
- Бас жүлде (300 000 теңге) – команда №49 (Құрамында төрт адам, Павлодар). Олар XGuard веб-құралын таныстырды – машина оқыту технологиясына негізделген автоматтандырылған сараптама жүйесі.
- Екінші орын (200 000 теңге) – команда №34 (Аубакиров Асхат және Шерстобитов Александр, Шымкент). Олар математикалық модельге сүйенген ИИ-жүйе әзірледі.
- Көрермендер көзайымы – командалар №62 және №57. Бірі тәуекелдерді бағалау веб-қосымшасын жасап, 10 000 синтетикалық дерек құрса, екіншісі – сатып алулар бойынша деректерді ыңғайлы форматта ұсынатын интерфейс ұсынды.
Екінші кейс – волонтерлерге арналған портал:
- Бірінші орын – команда №27 (Жорабек Алимжан мен Базарбаев Ерасыл). Олар SENIM платформасын ұсынды.
- Екінші орын – команда №55 (Артем Пинигин және Иван Ефремов), құрылғы түріне бейімделетін қосымша әзірледі.
- Көрермендер көзайымы – команда №32 (Артем Кузнецов және Богдан Некрасов), олар Anticor атты мобильді қосымша таныстырды.
HackCor Hackathon – жас мамандардың командалық жұмысын, жылдам прототиптеу қабілетін және шешімдерін таныстыру шеберлігін көрсете алатын алаң. Ұсынылған жобалар жемқорлық тәуекелдерін алдын ала анықтауға мүмкіндік береді және жетілдірілсе, мемлекеттік органдардың жұмысына енгізілуі мүмкін.
«Біз студенттердің, жас әзірлеушілердің және оқушылардың мемлекеттің ашықтығына ықпал ететін технологиялар әзірлегенін көрдік. Мұндай бастамалар болашақ мамандардың жаңа буынын тәрбиелейді», – деді «Террикон алқабы» бас директоры Сабыр Ниязов.
Мұндай хакатондар тек шабыттандыру ғана емес, сонымен қатар цифрлық жауапкершілік мәдениетін қалыптастырып, жаңа стартаптар мен мемлекеттік құрылымдар арасындағы ынтымақтастықтың негізін қалайды.
