Қазақстан цифрлық трансформация мен блокчейн экономикасын дамыту жолында тағы бір маңызды қадам жасады. Астанада Орталық Азиядағы алғашқы Solana Economic Zone Kazakhstan экономикалық аймағының ресми ашылуы өтті.
Solana Foundation қолдауымен ұйымдастырылған іс-шараға мемлекеттік органдардың өкілдері, халықаралық сарапшылар мен Web3 экожүйесінің жетекшілері қатысты. SEZ KZ іске қосылуы Astana International Forum 2025 қарсаңында өтіп, технологиялар, инвестициялар және мемлекеттік саясат тоғысындағы маңызды оқиғаға айналды.
Халықаралық тәжірибе көрсеткендей, цифрлық экономика үшін мамандандырылған аймақтарды құру — технологиялық серпілістің тиімді құралы. Мысалы, Дубайда жұмыс істейтін Dubai Multi Commodities Centre (DMCC) Crypto Centre-де ондаған блокчейн-компаниялар орналасқан, қолайлы реттеу жүйесі жұмыс істейді, ал стартаптар инфрақұрылым мен инвестицияларға қол жеткізе алады.
Қазақстан үздік халықаралық тәжірибелерді өз стратегиялық мақсаттарына бейімдей отырып қабылдап отыр. Solana Economic Zone тәжірибе алмасу, шешімдерді сынақтан өткізу және қазақстандық компаниялардың жаһандық нарықтарға шығуы үшін платформаға айналады.
Жаслан Мадиевтің айтуынша, Solana Economic Zone іске қосылуы Қазақстанның заманауи цифрлық технологияларды экономикаға интеграциялауға дайын екенін көрсетеді:
«Біз тұрақты және бәсекеге қабілетті цифрлық ортаны құруды мақсат етеміз. Solana Economic Zone сияқты жобалар бізге активтерді токенизациялаудан бастап Web3 саласындағы кадрлық әлеуетті дамытуға дейінгі жаңа тәсілдерді сынап, енгізуге мүмкіндік береді».
Іс-шара барысында энергетика, қаржы, агротехнология, геймдев және сауда сияқты салаларда жұмыс істейтін халықаралық стартаптардың блокчейн негізіндегі шешімдері ұсынылды. Сондай-ақ құнды қағаздар, алтын, жылжымайтын мүлік және басқа активтерді токенизациялау мүмкіндіктері талқыланды.
Кездесу нәтижесінде келесі бағыттарды қамтитын стратегиялық меморандумға қол қойылды:
- Капитал нарығын токенизациялау:AIX, Solana Foundation, Jupiter және Intebix қатысуымен жұмыс істеп тұрған қаржы инфрақұрылымына токенизацияланған құралдарды енгізуге бағытталған пилоттық жоба.
- Web3-таланттарды дамыту:Министрлік пен Solana Foundation Rust және блокчейн инженериясы бойынша білім беру бағдарламасын іске қосады. Университеттермен және Astana Hub-пен ынтымақтастық жоспарланып отыр.
- Халықаралық Web3-компанияларды тарту:Forma компаниясымен бірлесіп, жаһандық стартаптарды қолдау бағдарламалары жүзеге асырылады. Оларға инфрақұрылымға қол жеткізу және реттеушілік сүйемелдеу ұсынылады.
