Қазақстан мен Қытай «Ақылды кеден» пилоттық жобасын іске қосты. Жоба аясында жүргізушісіз жүк көліктері шекараны алғаш рет өздігінен кесіп өтуде. Бұл бастама «Бақты» (ҚР) – «Покиту» (ҚХР) өткізу пункттерінде жүзеге асырылып жатыр.
Қаржы министрлігінің хабарлауынша, жоба барлық рәсімдерді цифрландыруды көздейді: бірыңғай электрондық декларация енгізіліп, навигация мен бақылау автоматтандырылды, ал жүктерді рәсімдеу толығымен электронды түрде жүргізіледі.
Министрлік бұл бастаманың бірқатар тиімділігін атап өтті:
– жүк ағынын жылына 10 млн тоннаға дейін арттыру;
– кедендік рәсімдеу уақытын қысқарту;
– тасымалдау шығындарын азайту;
– логистиканың ашықтығы мен қауіпсіздігін күшейту;
– агроөнімдердің (астық, ет, майлы дақылдар мен өңделген тауарлар) экспортына серпін беру;
– шекара маңындағы аймақтарда логистикалық хабтар мен инфрақұрылымды дамыту.
Жоба сондай-ақ жаңа жұмыс орындарын ашып, инвестиция тартуға мүмкіндік береді. Қаржы министрлігінің пікірінше, бұл бастама Қытаймен сауда-экономикалық ынтымақтастықты нығайтып, Қазақстанның Орталық Азиядағы негізгі транзиттік торап ретіндегі рөлін күшейтеді.
Бастама аясында кедендік және логистикалық процестерді бірігіп цифрландыру бойынша өзара ынтымақтастық туралы меморандумға қол қойылды.
